قصة الابتعاث

قصة الابتعاث


في البداية وحتى أكون صادق معاكم لما كنت في المرحلة الثانوية كان أمامي خيارات متعددة ولكن ماكنت أشوف منها غير جامعة البترول، ولعل السبب من الكلام الكثير الي اسمعه من المجتمع الي حوالي إن الطالب مستقبله في هذه الجامعة وهي الي تحدد مصير الطالب يا يكون أو لا يكون
يعني الطالب إذا انقبل في جامعة ثانية ماراح يكون الدخل المادي مثل الدخل المادي لخريجي البترول

هذه الفكرة خذت حيز كبير من تفكيري وعلى أساس إن الي مثل مستواي التعليمي ( يعني مثل مايقول المجتمع إني دافوور في دراستي ) ما يصلح لي غير البترول

مضت الأيام وتخرج من ثالث ثانوي ولله الحمد بنسبة أنا أفتخر فيها أولاً ورفعت راسي أهلي ثانياً ، وكان المكتوب إني ما انقبل في هذه الجامعة لسبب النسبة الموزنة لدفعتي كانت 79% وأنا نسبتي الموزونة كانت 78.5 فقط فارق نصف نسبة لا غير

بيني وبينكم جاني نوع من الإحباط والقرف وحسيت إن كل السبل الي أمامي تسكرت ولا لي مخرج غير التقنية ، بس قبلها برضوا سجلت طب أسنان وصارت معي نفس حركة البترول وهذا الي حسيت إن الدعوة استقعآآد ، بعدها خطرت في بالي فكرة الابتعاث وطرحتها على أبوي ربي يحفظهـ وكان في البداية متررد لأني كنت ناوي أسافر على حسابي الخاص ، وأبوي ماكان يحب المغامرة كثير ( يعني مايلعب إلا على المضمون )

أبوي اقترح عليّ إني أسجل في جميع برامج الابتعاث لعلى وعسى أكون مقبول في أحدهم .. وبالفعل سجلت وفي كل برنامج تصير لي مشكلة مادري شنو تبي ..
على سبيل المثال ..
الخطوط السعودية .. يقولون لي طولك مش مناسب ( أبي أعرف شنو قضية الطول في الموضوع ما ني بعارف ) وفي برنامج ثاني سجلت وكانت المشكلة في النسبة الموزونة برضوا حتى صارت معاي عقدة
.5%

تعرفون الإحساس لما تصير كل الأبواب مسكرة قدامك ، كان معاي واستمر معاي لفترة من الزمن ..
بعد مرور نصف سنة ( دققوا عليها ) كلمت أبوي مرة ثانية وعطاني الموافقة الي أنا استغربت منها بس ( يافرحة ما تمت ) كلمني وقال خلاص كنسلت الموضوع .. طيب استمريت في هذه الفترة أدرس لغة ليه ؟؟

لأني كنت أقول لا يمكن أبوي يشوف واحد من أبنائه كذا ويظل ساكت ، إلا ما يجي يوم ويوافق
وبالفعل انتهى السمستر الثاني وقضت الإجازة بس قبلها كنت مكلم أبوي وعطاني الضوء الأخضر وخلصت امممم تقريباً ثلث أموري وفجأة قالي أبوي خلص أنا كنسلت الموضوع

يمكن البعض منكم يقول شنو هذا الإنسان ماعندهـ شخصية أو شيء من كذا ..
خلوني أقول لكم حاجة .. كل إنسان في هذه الدنيا عنده مبادئ يمشي عليها وأنا كإنسان عندي الكثير من المبادئ ومن ضمنها إن رضى الرب من رضى الوالدين

أنا كان بمقدوري أطيح دمعتين وأدخل أمي كواسطة ( بالعربي أسلوب كسر الخواطر ) بس شنو الفايدة إذا انا ابتعثت وأنا داري إن أبوي مش مقتنع قناعة تامة بالفكرة ..

وبنفس الوقت كنت متقين أن أبوي راح يوافق في يوم من الأيام وبالفعل وبعد فترة معينة اتصل عليّ وقالي احجز التذاكر وروح والقلب داعيلك ..

كان الخبر فيه نوع من الفرحة والحزن في نفس الوقت ساعتها مادري شنو صار فيني مادري أبكي ولا أفرح ولا شنو أسوي بالضبط ..

وحلم وحققناهـ بتاريخ 26 من إكتوبر 2009 وكنت في البداية على حساب أبوي وبعدها بـ 3 شهور تم الحاقي ببرنامج سيدي ومولاي خادم الحرمين الشريفين الملك عبدالله بن عبدالعزيز آل سعود حفظه الله ورعاه

ولما خبرت أهلي حسيت من نبرات صوتهم الإحساس لي يكون عند إنسان ميؤس من شفائه وبعدها يفاجئ بشفائه ( فهمتوا أنتوا صح !!) وقالي أبوي الآن أنت خير سفير لخير وطن


أدري إنكم تقولون شنو هالنشبة من اول مذكرة له بس حبيت أوصل لكم إن الي عنده إي حلم في حياته لا يستسلم منه بسهولة ومهما تصادفك من عقابات كونوا على يقين إنها اختبار من رب العالمين وهالعقبات راح تنزاح بالإرادة والقوة

سلملم

^ــ^